Informashon pa studiantenan di Aruba, Kòrsou, Sint Maarten i Hulanda Karibense pa inskripshon den Basisregistratie Personen (BRP)

Denter di poko bo ta bai studia na Hulanda?

E ora ei ta importante pa bo regla algun asuntu pa bo inskripshon na Hulanda promé ku salida i despues di yega Hulanda.

Pa studiantenan for di: Boneiru, Saba, Sint Eustatius, Aruba, Sint Maarten, Kòrsou
 

Paso 1. BSN ora di hasi petishon pa finansiamentu di estudio

Bo ta pidifinansiamentu di estudio pa un estudio na Hulanda? I bo tin nashonalidat hulandes, pero bo no tin un Burgerservicenummer (BSN, Number di servisio sivil) ainda? E ora ei bo ta haña un BSN ora bo pidi finansiamentu di estudio. Ku bo BSN bo por kuminsá regla algun asuntu na Hulanda for di awor, tambe ora bo no ta na Hulanda ainda. Pa pidi finansiamentu di estudio bo ta wak riba DUO.

Bo no ta pidi finansiamentu di estudio? E ora ei ta te ora ku bo ta na Hulanda bo por pidi un BSN. Lo bo haña un BSN e ora ei despues di inskripshon den e Basisregistratie  Personen (BRP, Registrashon Básiko di Persona) di e munisipio hulandes unda bo ta bai biba.

Paso 2. Risibí bo BSN

Bo ta risibi bo BSN via pòst di Rijksdienst voor Identiteitsgegevens (RvIG, Rijksdienst pa Dato di Identidat). Komo ku e pòst pa e área Karibense tin biaha por dura largu, bo por apliká pa bo BSN tambe telefonikamente for di awor serka DUO. Pa hasi esei  bo tin ku warda te ora e e-mail di DUO drenta ku e mensahe ku a prosesá bo petishon pa finansiamentu di estudio. Den e e-mail ei, tin e number di telefòn unda bo por pidi bo BSN.

Paso 3. Apliká pa i aktivá DigiD

Ku bo BSN, bo por apliká pa bo DigiD. DigiD ta e medio online pa log in pa gobièrnu. Bo tin mester di bo DigiD entre otro pa bo produkto di biahe pa studiante i pa log in riba Mijn DUO. Mas informashontokante aplikashon i aktivashon di bo DigiD bo ta haña riba e wèpsait di DigiD .

Paso 4. Sita munisipio pa inskribí den e BRP

Denter di 5 dia despues di bo yegada na Hulanda bo tin e obligashon di inskribí bo mes den e BRP di e munisipio unda bo ta bai biba. Wak riba e wèpsait di e munisipio si bo por hasi un sita adelantá pa e inskripshon den e BRP.

Tip: tin biaha, munisipionan tin sitanan òf dianan di inskripshon apart pa studiante pa inskripshon den e BRP. Informá tokante e posibilidat aki serka e munisipio unda bo ta bai biba òf e instituto di enseñansa unda bo ta bai studia.

Paso 5. Kanselá bo inskripshon den registro sivil

Denter di 10 dia promé ku bo salida, bo ta kanselá bo inskripshon den registro sivil di e isla unda bo ta biba. Esaki ta obligatorio. Durante e kanselashon, indiká den kua munisipio na Hulanda bo ta bai biba. Bai Hulanda ku e komprobante di kanselashon di inskripshon, esaki ta un di e dokumentonan ku bo mester pa inskripshon na Hulanda.

Paga tino: bo ta inskribí bo mes na un otro munisipio hulandes ku esun bo a indiká na momentu ku bo a kanselá bo inskripshon? E ora ei, lo manda bo datonan personal pa un otro munisipio. Esaki por trese un retraso di algun siman di bo inskripshon den e BRP.
 

Paso 6. Inskripshon den e BRP na e munisipio

Si bo ta bai keda na Hulanda pa mas ku 4 luna, bo tin e obligashon di inskribí bo mes den e BRP. Bo mester hasi esaki denter di 5 dia despues di bo yegada, na e munisipio unda bo ta bai biba. Traha un sita pa esaki serka e munisipio.

Dokumentunan ku semper bo tin mester.

• un pasport bálido;
• e komprobante original di e kanselashon di inskripshon di Registro Sivil;
• e komprobante di e adrès na Hulanda unda bo ta bai biba. Por ehèmpel un kopia di e kontrato di hür òf un karta firmá i kopia di e karnèt di identifikashon di e habitante prinsipal di e kas, si e persona ta duna pèrmit pa bo biba den su kas.

Tin biaha un munisipio ta pidi tambe pa;

• un sertifikado di nasementu: pidi pa esaki na Registro Sivil di e lugá kaminda bo a nase. Bai Hulanda ku e akta original. Bo no a nase den e parti Karibense di Reino? Apliká pa un sertifikado di nasementu (di eksterior) na tempu i den kaso ku esaki ta nesesario laga legalisá i tradusí esaki. Wak pa mas informashon, riba nederlandwereldwijd.nl.
• un pèrmit di bibienda; na sierto munisipio bo mester di un pèrmit di bibienda. si bo ta hür un bibienda sosial òf ta bai biba serka un hende ku ta hür un bibienda sosial. Un pèrmit di bibienda bo ta pidi promé ku inskripshon den e BRP na e munisipio. Wak riba e wèpsait di e munisipio si bo tin mester di un pèrmit di bibienda.
   

Link i informashonnan útil

Dienst Uitvoering Onderwijs (DUO)

Pa aplikashon pa òf preguntanan tokante finansiamentu di estudio.
+31 (0)50 599 77 55
www.duo.nl/antillen

Rijksdienst Caribisch Nederland

Informashon tokante e opstarttoelage (gratifikashon inisial).
+599 715 83 33
www.rijksdienstcn.com/studiefinanciering
studiefinanciering@RijksdienstCN.com

Arubahuis

E departamento di Enseñansa di Arubahuis (Kas di Aruba) ta duna informashon i instrukshonnan na studiantenan di Aruba promé ku nan sali pa Hulanda. Na Hulanda nan ta yuda ku e akohida i guia di studiantenan ku fiansa pa estudio for di Aruba. Den kada region hulandes tin un mèntòr di estudio ku ta guia e studiantenan

+297-528-3400 | +31 (0)70 356 62 00
www.arubahuis.nl/afdelingen/onderwijs
www.ea.aw/pages/studia-na-hulanda
info@arubahuis.nl | arubalening@ea.aw (fiansa di estudio)

Stichting Studiefinanciering Curaçao (SSC)

Na Kòrsou SSC ta atendé ku e aplikashonnan di finansiamentu di estudio pa studiantenan for di Kòrsou. Na Hulanda e departamento ta sòru pa akohida, 
guia i bibienda pa e studiantenan. Kada region di Hulanda tin mèntòrnan ku ta guia e studiantenan.

+599 9 724 7272 | +31 (0)30 285 5070
www.ssc.cw | info@ssc.cw

Dienst Studiefinanciering Sint Maarten (DSF)

DSF ta regla e finansiamentu di estudio adishonal pa e studiantenan for di Sint Maarten. Na Hulanda tin mèntòrnan i “buddy’s” ku ta asistí i guia e studiantenan ku un fiansa di estudio for di Sint Maarten.

+1-721-527-3840
studyfinancing-sxm.com | info@studyfinancing-sxm.com

Mas pregunta?

Bo tin pregunta tokante e inskripshon den e BRP na Hulanda òf pa haña un BSN? Tuma kontakto ku e Rijksdienst voor Identiteitsgegevens (RvIG), via info@rvig.nl òf +31 (0)88 900 1000.

Kolofòn

Rijksdienst voor Identiteitsgegevens
Ministerie van Binnenlandse Zaken en Koninkrijksrelaties
Postbus 10451 | 2501 HL Den Haag
www.rvig.nl

Klik aki pa e pdf